VIDEO nga operacioni “Shpirti”, pamje nga bastisjet e policisë dhe RENEA-s në banesat e të arrestuarve

Policia e Shtetit ka publikuar pamjet nga operacioni ndërkombëtar i koduar “Shpirti”, për goditjen e trafikut ndërkombëtar të lëndëve narkotike, korrupsionit dhe pastrimit të parave.

Pamjet tregojnë momentin kur forcat speciale RENEA bastisin banesa të ndryshme ku ndodheshin të arrestuarit.

Ju gjithashtu mund të pëlqeni

Drejtori i Policisë së Shtetit Ardi Veliu tha se janë ekzekutuar 18 urdhër-arreste në Shqipëri nga 28 në total.

Arrestimet janë bërë në Vlorë, Kavajë, Tepelenë, Skrapar, Gjirokastër dhe Tiranë.

Gjatë operacionit janë sekuestruar 2 armë zjarri dhe rreth 60 mijë euro.

Për ekzekutimin e masave të sigurisë të dhëna nga Gjykata e Posaçme e Shkallës së Parë për Korrupsionin dhe Krimin e Organizuar, në kuadër të operacionit “SHPIRTI”, janë angazhuar 200 forca policore nga reparti special Renea, FNSH Tiranë e Fier, Drejtoria e Forcës së Posaçme Operacionale në Drejtorinë e Përgjithshme të Policisë së Shtetit, Drejtoria Hetimore në Departamentin e Policisë Kriminale, si dhe Drejtoritë Vendore të Policisë Tiranë, Vlorë, Gjirokastër e Durrës.

Operacioni është zhvilluar në kushte të larta sigurie për forcat policore pjesëmarrëse, në të njëjtën kohë në të gjitha qarqet, për ekzekutimin e urdhrave të lëshuara nga Gjykata.

Interpol Tirana dhe Fast Albania po bashkëpunojnë me homologët për kapjen e personave të shpallur në kërkim ndërkombëtar në kuadër të këtij operacioni.

Edhe në këtë operacion Policia e Shtetit tregoi profesionalizëm të lartë dhe besueshmëri te partnerët, e shprehur kjo edhe gjatë konferencës së përbashkët të zhvilluar paraditen e sotme në ambientet e SPAKU-t, nga krerët e policive dhe agjencive ligjzbatuese pjesëmarrëse në këtë operacion.

Policia e Shtetit siguron se është shumë e vendosur dhe e angazhuar maksimalisht për të punuar dhe bashkëvepruar me partnerët ndërkombëtarë dhe agjencitë e tjera ligjzbatuese, brenda dhe jashtë vendit, me qëllim parandalimin, evidentimin, hetimin dhe goditjen e krimit të organizuar në cilëndo fushë që ai shfaqet.

Post Views: 696