Kapja e AMA-s’, UGSHPD: Thikë e pabesë pas shpine për lirinë e medias nga parlamenti i Ramës

Unioni i Gazetarëve Shqiptarë Profesionistë të Diasporës (UGSHPD), me shumë shqetësim e mori lajmin se parlamenti i delegjitimuar i Edi Ramës po e shndërron përfundimisht Autoritetin e Mediave Audiovizive (AMA) në një zyrë të kryeministrit aktual, e njëjtë me zyrën e dikurshme të shtypit pranë Komitetit Qendror të Partisë së Punës të Shqipërisë.

Aktin e paprecedent, një thikë e pabesë pas shpine për lirinë e medias, parlamenti i Edi Ramës e ka ndërmarrë nëpërmjet faktit të kryer, duke zënë në befasi të plotë opinionin shqiptar dhe punonjësit e mediave në Shqipëri. Pa asnjë paralajmërim, pa asnjë diskutim paraprak, ndryshimi në krye të Autoritetit të Mediave Audiovizive, është bërë për të sjellë në krye të institucionit një nga kryepropagandistet më të zellshme, Armela Krasniqin, ish zëdhënësen e kryetarit të Partisë Socialiste Edi Rama. Ky veprim në Komisionin Parlamentar të Medias është ndërmarrë duke shkelur në mënyrë flagrante ligjet përkatëse në fuqi lidhur me konfliktin e interesit. Në të njëjtën kohë, Edi Rama ka uzurpuar plotësisht AMA-n duke rrëmbyer vendet që i takojnë opozitës në bordin e këtij institucioni.

Unioni i Gazetarëve Shqiptarë Profesionistë të Diasporës (UGSHPD) konstaton me brengosje të madhe se, me këtë veprim, Edi Rama, si armik i përbetuar i lirisë së mediave, i përshkallëzon përpjekjet e tij të parashikuara nga paketa e ashtuquajtur antishpifje, e cila ngjalli aq shumë reaksion edhe në institucionet perëndimore. Kjo paketë e ashtuquajtur antishpifje do të instalonte përfundimisht organin famëkeq oruellian të censurës ndaj platformave televizive, portaleve dhe mediave online.

Është e domosdoshme dhe jetike që shoqëria në Shqipëri, punonjësit e mediave, të gjithë ata që e duan fjalën e lirë dhe mendimin e lirë, o sot, o kurrë të ngrenë zërin dhe të kundërveprojnë energjikisht për ta zbrapsur Edi Ramën nga ky revansh i mbrapshtë totalitarist ndaj lirisë së mediave, pa të cilën nuk mund të përfytyrohet asnjë shoqëri demokratike sot dhe të ardhmen në Shqipëri.

Unioni i Gazetarëve shqiptarë të Diasporës (UGSHPD) ia kujton trupit diplomatik perëndimor në Shqipëri, organizmave perëndimore dhe ndërkombëtare të mediave, institucioneve në Perëndim, gjithë botës demokratike se është kjo koha përfundimtare kur të veprohet për t’i thënë ndal Edi Ramës dhe për të mos e lejuar të kryejë këtë atentat që ka për qëllim fundin e çdo shprese për demokracinë në Shqipëri.