Kolegji Zgjedhor vulos edhe Vlorën, rrëzon kërkesën e PD-LSI

Kolegji Zgjedhor nuk mendon se PD dhe LSI kanë prova të mjaftueshme për të shpallur të pavlefshëm rezultatin e 25 prillit në Vlorë.

Ashtu si me Gjirokastrën, trupa gjyqësore vendosi për të rrëzuar kërkesën e opozitës për të përsëritur zgjedhjet në qarkun e Vlorës, duke e lënë të pandryshueshme shpërndarjen e mandateve, 8 për PS, 4 PD, ndërsa LSI pa asnjë deputet.

Në një prononcim për mediat pas seancës, përfaqësuesi ligjor i PD-së, Ivi Kaso, e cilësoi një shans të humbur.

“E them me keqardhje që është një shans i humbur por nuk na dekurajon për të vazhduar dh për të kërkuar transparencë, për të bërë publike fakte dhe prova të çdo lloj shkelje të ligjit që ka influencuar thelbësisht vullnetin e zgjedhësve në 25 prill, shqiptarët nuk patën mundësi të votonin të lirë dhe të shpreheshin të lirë me votë”.

Pavarësisht se vendimi i Kolegjit nuk e legjitimoi akuzën e PD për masakër zgjedhore në Gjirokastër dhe Vlorë, opozita nuk do të ndalet që t’i shkojë deri në fund betejës në gjykatë për 7 qarqet e tjera.

“Detyrimin për transparencë e kemi jo vetëm për ata që i besuan ofertës sonë për ndryshim në 25 prill por edhe ndaj gjithë shqiptarëve pasi procesi zgjedhor duhet të çlirohet njëherë e mirë nga të gjithë efektet nevative të cilat e kanë përshirë në zgjedhjet e fundit, veçanërisht në procesin e 25 prilit janë vërtuar me fakte dhe prova para të gjithëve. Sa kohë kemi një tribunë për të folur, gjykatë për tu ankuar dhe forum për tu shprehur ne do ti shkojmë deri në fund kërkesës tonë për transparencë dhe hedhje dritë të çdo lloj shkelje të ligjit që ka deformuar thelbësisht vullnetin e shqiptarëve në datë 25 prill”.