Live TV
Shembjet, degradimi, tjetersimi dhe harresa ndaj objekteve të trashigimisë kulturore dhe monumenteve po e kthejnë Shkodrën një qytet pa identitet, për fat të keq duke i ngjarë kryeqytetit shqiptar, aty ku gjurmët e të shkuarës janë zhdukur me shpejtësinë e erës. Rasti i fundit i Kafes së Madhe, i cili hapi një debat të gjërë, është ndoshta dëshmia më e mirë sesi shteti nuk egziston për të tilla objekte të rëndësisë së veçantë që gëzojnë status prej vetë këtij të fundit.
Ajo u la deri në pikën kur zgjidhja për ta kthyer në identitet, ishte shembja e mbi 90% të ndërteses, për ta rindërtuar nga e para duke ruajtur vetëm fasadën. Në këtë pikë duhet thënë fatmirësisht ajo nuk u tjetërsua për të mbirë një objekt tjetër siç ka ndodhur me shumë raste të ngjashme, ku mbi banesa të vjetra apo monumente kanë lulëzuar pallate e godina shumëkateshe. Megjithatë ndjeshmëria si qytetare dhe institucionale mbetet e brishtë dhe tekanjoze në mënyrën si i trajton këto gjëra, kur në të vërtetë ato duhet të jenë shqetësimi i të gjithëve, sepse përbëjnë identitetin tonë, atë të Shkodres kush ishte dhe si do të jetë.
Por këto zëra nuk e bëjnë këtë gjë, sepse në Shkoder janë mësuar të heshtin edhe pse skandalet kanë qënë shumë herë më të mëdha se rasti i Kafes së Madhe, që së paku po rindërtohet. Shembja e shtëpisë së Luigj Gurakuqit përbën një nga kryeskandalet më të mëdha të historisë së Shqipërisë post – komuniste, ku fadromat rrafshuan një monument të kategorisë së parë, një pjesë të identitetit të Shkodres, asaj që përfaqësonte mënyrën si ishte zhvilluar jeta familjare, por edhe arkitektura e ndërtimit në këtë qytet. Bashkia Shkodres asokohe dhe i gjithë qyteti mbyllën gojën, sytë dhe veshët për tu pajtuar me atë krim që ndodhi në mes të ditës, përpara të gjithëve.
Ju gjithashtu mund të pëlqeni
Të njëjtin fat pati edhe shtëpia e Pionerit ku u zhvillua një pjesë e rëndësishme e jetes kulturore dhe u formuan breza të tërë artistësh. Heshtje varri edhe për monumentet e tjera në qytet dhe zonën muzeale në tërësi, që rrënohet nga dita në ditë, duke na treguar se ajo pjesë e së shkuarës me të cilën mund dhe duhet të krenohemi, po na ikën për shkak të shtetit që për këto gjëra nuk mban përgjegjësi dhe nuk shqetësohet. Rrugëtimi 31 vjeçar i Shkodres mund të cilësohet një tragjikomedi në vete, ku ndërsa shëmbim identitetin tonë, kemi ngritur përpara syve godina të shëmtuara që kanë asfiksuar zemrën e qytetit, duke i humbur cdo hijeshi që ajo kishte.
http://www.kopliku.tv
Call +355 211 22840